ГӏалгӀайче хьалха латт, Къилбаседа Кавказе ЖКХ ахча банке гӀолла дӀалуча
ГӏалгӀайчен Паччахьалкхено кхетаче дӀайихьар, республике карташка гӏолла декхар дӀадалара хетаяь. Вице-премьера Кукурхой Адама из хаттар дийцар РФ Центральни банка Къулбехьен керттерча урхаллен кулгалхочунца Эберенц Евгенеца, иштта ГӏалгӀай Республикан Къаман банка отделене кулгалхочунца Ужахьанаькъан Мухьмад-Бекаца, яхаш, хоам бу «Сердало» газетага мехка Кулгалхочун, Паччахьалкхен зарбан болх лелабераша.
Лоаттадеча хоамаша яхачох, ГӏалгӀайче хьалхарча моттиге я Къилбаседа Кавказа федеральни куран тӏагӀолла вахара-коммунальни хьалех дола ахча банке гӀолла дӀалуш хилара - 59,7%. Республикан туристически даькъ тӀа, из хьал бӀаь процент чулоацаш да - еррига отелаш, гостиницаш хьаийдеш я банкашка гӀолла дӏадохьийташ дола ахча.
Даьхача толамашка хьежжа доацаш, Кукурхой Адама белгалдир, дӀахо а цу тайпара ахча дӀалуш хилар дегӀадоаладе дезилга. Цо белгалдир терминалаш кхоачам боацаш хилар мах беча даькъ тӀа, базарашка, кхыча хьалаш лоаттадеча даькъ тӀа.
«Дӏахо из хьал дикагӀа дегӀадоаладара терминалаш дукхагӀа еза», - аьлар вице-премьера.
Кукурхой Адама иштта хьоахадир, кара ахча дӏа ца луча кепара декхараш такхар юкъедаккхара маӀан - бахархошта аттагӀа дола хьалаш хьакхоллар, тешаме хилийтар коммунальни хьалех бола мах дӀабалар, иштта транспорта а туристически гӏулакхашта а билеташ эцар.
