ВСУ оагӀорахьара герз дийттача Токмака, новкъостал дергда
Ше фу эш хьожаш лелаеча Запорожски областа Токмака шахьара новкъостал дергда ГӀалгӀайчено, ВСУ оагӀорахьара герз дийтта цунна зулам даь хиларах, яхаш, дийцар мехка Кулгалхочо Келаматанаькъан Махьмуд-Ӏаьлас.
«Вай терко лоаттаеча Запорожски областа Токмакски кхален хатар хиннад. Украинерча террористаша вӀаштӀара даьча цӀеношка бахача наха герз чудийттад, цига нах байнаб, цу юкъе бераш а.
Из лаьрххӀа даь зулам да, бехк боацаш бола нах боабе дагахьа, адамаша де йиш йоаца ийрча хӀама да из. Оаха, хала хеташ, тӀаийцар нахага кхаьча бала, иштта дег чура кодам беш дола дешаш аьлар байнарий гаргарча нахага, Запорожски областа губернаторга Балицкий Евгенега. Лозабаьрашта сихагӀа дарба хилар лов.
ГӀалгӀайчено шийна могаш дола новкъостал дергда, Токмака кхален кулгалхошта, цун бахархошта», - аьлар ший телеграм-канале ГӀалгӀай Республикан кулгалхочо Келаматанаькъан Махьмуд-Ӏаьлас.
Цу ВСУ террористаша даьча зулама юкъе итт маьрша саг веннав, царна юкъе ши бер а да. Дуккхабараш, лозабаь, дарбанчешка ба. Токмаке наьха цӀенош хоарцадаьд, шахьара хьалаш а толхадаьд.
