«Тахан Россен мах бара-промышленни палате гойтаргья инвестицей, промышленноста, туризма доакъошкара республикан таронаш. Вай дувца а инвесторашта, туристашта, доалахьара хӀама леладе безам барашта гойта а хӀама да», - аьлар мехка кулгалхочо Келаматанаькъан Махьмуд-Ӏаьлас, ше паччахьалкхен лоархӀамегӀа йола, цу лостамашкара таронаш ювцаш. Цо лакха мах бир республикан бахархошта, къахьегама тӀера болча наха карагӀдувлача хӀамай, иштта белгалдаьккхар ГӀалгӀай Республикан вахара хьалаш дегӀадоагӀаш хилар.

Келаматанаькъан Махьмуд-Ӏаьлас дӀахо терко тӀаяхийтар, республикан экономике тӀехьарча хана промышленни оагӀув, туризм, иштта хӀанз мара дӀайолаяь йоаца ӀТ - оагӀув дегӀайоагӀаш хилара. Из деррига а хьагойташ хул, лоархӀаме къамаьл дӀахьоча хана.

«Республика кийча я инвестицеш юкъеяха, со тешаш ва, гойтамо таро лургья дӀахо ГӀалгӀайче дегӀайоалае, шоай доалахьара хӀама дӀадоладе безам бараш хургба цу гӀулакха терко тӀайохийташ», - аьлар ГӀалгӀай Республикан Кулгалхочо, кхетачен доакъашхошта дика толамаш дахара тӀехьа ловца а боаккхаш.