Тӏемхошта, берашта лаьрхӏа хӏамаш яхьийтар вай республико
Тӏема аренашка лелача бӏухошта, иштта берашта лаьрхӏа хӏамаш яхьийтар вай мехкара. Из хоам «Сердалога» бир «ZА - Правду» яхача ганза зарбан болх лелабераша. Тӏема операце доакъашхой дезалашта новкъостал лоаттадеча ганза кулгалхо Хутенаькъан Рамзан, Къаман фронта моттигерча исполкома кулгалхо Танкенаькъан Башир юкъе волаш, араяьлар гӏо ийца йода машин мехкара.
Молочанскерча шин берий беша, мерза совгӏаташ декъаргда укх наькъа. Бераш долча дезалашта гӏо деш боаржабаь болам ба из. Цул совгӏа, вай мехкадас Келаматанаькъан Махьмуд-ӏаьлас тӏадилла, ерригача Россе «Деррига а котало бахьан долаш» яхача боламга гӏолла, «ZА - Правду» яхача ганза моттигерча Къаман фронта оагӏонца 58-ча эскара 503-ча полка бӏухошта тайп-тайпара кхоачам хулийтаргба. Шиъ базови радиостанци, 20 портативни оала раци дӏалургья царна. Уж хӏамаш царна чӏоагӏа эшаш я, тӏема декхараш кхоачашдеш.
Ишта кхыйола хӏамаш я тӏемхошта лаьрхӏача машина тӏа - дикка ха яллалца талхаш боаца кхача, хӏара дийнахьа эшаш йола хӏамаш, ӏовужача хана эшаш бола кхоачам, иштта кхыдараш а. Цу гӏулакха юкъе дакъа лаьцар паччахьалкхен моттигаша, бахархоша. Республикерча Россе Федеральни йоалах йолча моттига бувзам лелабе эшаш йола, бӏухошта эшаш хиннача тайпара йола хӏамаш яхьийтар цига.
«Доагадаь вахар» яхача гӏо лоаттадеча ганза доагама хьекха кремаш, мазаш яхьийтар цига. Наьсарерча Гаьгенаькъан Г. цӏерах йолча унахцӏенон колледжо чай молаш эшараш гулдир, иштта моллагӏча моттиге гӏолла чакхйоалаш йола мотоцикл яхьийтар.
Иштта цхьаькха колледжо тӏема операце доакъашхошта метташи гӏайбаши дахьийтар. 503-ча полка медсанчасте молхаш яхьийтар ООО «Регион Юг» яхача оагӏоно, мехкарча Роспотребнадзора. Кхерамзлен гӏулакхех йолча Федеральни оагӏонцарча моттиго ханахьа талхаш боаца кхача бахьийтаб бӏухошта.
«Из тайпара гӏо геттара чӏоагӏа эшаш да тӏема аренашка. Къаьстта ӏан хана бӏайха, кера атта бола кхача эш бӏухошта»,- белгалдир Хутенаькъан Рамзана.
