Токмакски кхаленна хӏамаш яхьийтар вай мехкара
22.09.2025 13:16
Вай мехкадас Келаматанаькъан Махьмуд-ӏаьлас тӏадилла, гӏо деш хӏамаш яхьийтар Токмакски кхален гӏишлошъяра гӏулакхех йолча министерствос. Из хоам «Сердалога» бир цу моттига зарбан болх лелабераша. Гӏишлошъяра балхаш деча эшаш бола кхоачам, гӏирсаш, барзкъаш да хӏамашта юкъе. Болх беча эшаш йола хӏамаш я уж ерригаш. Вай мехкара тоаба я Токмаке болх дӏахьош, дехараш тоадеш. Тӏемо йохаяь моттигаш меттайоалае гӏо ду вай Минстройс.
«Цу моттигашта эшачунга хьожаш я вай республика юххьанца денз. Токмакски кхален Администрацеца бувзаме даьле, цар яхачунга хьежжа кийчъю оаха хӏамаш. Йоккха юкъ ялалехь, хӏама вӏашагӏтоха, ӏояхьийта аьттув боал. Тахан аргӏанара мухь ба ӏохьош», - дийцар министерствонна хьалха латтача Иленаькъан Мусас.
