Промышленни технопарк хьалъе 500 млн ахча лургда вай мехка
Промышленни технопарк хьалъе федеральни грантага гӏолла 500 млн сом ахча лургда вай республиканна. «Пайда беш, дика экономика» яхача къаман проектага гӏолла йоаржаеш проект я из. Россе экономика йоаржаярах йолча Министерстве могадаь, федеральни оагӏонга гӏолла дикка техка дӏахьош гӏулакх да из.
Вай мехкадас Келаматанаькъан Махьмуд-ӏаьлас белгалдир, из технопарк вайцига дикка пайда беш хургхилар. Кӏалах еча хӏамай промышленность дикка тоаярал совгӏа, зӏамига, йоккха бизнес хьаллоацаш, болх бе керда моттигаш ӏалашъеш, кердадараш юкъедоахаш хургда из.
«Гӏалгӏайчен кхоанен беркате гӏулакх хургда цох. РФ Президента хьалхагӏа белгалдаьдар, 2030-ча шера бизнеса лаьрхӏа хьалъяь 100 промышленни технопарк хила еза аьнна», - хьоахадир вай Мехкадас.
Республикан хьал тоадара тӏехьа къахьегаш болча къонача болхлошта, инженерашта, бизнесменашта аьттув луш хургья технопарк. Иштта йолча технопарка боккха пайда бергба зӏамигача, юкъерча бизнеса, лабораторешта, инженерни моттигашта, кхыдарашта. Из деррига а вай мехкара экономически хьал тоадеш хургда.
