Карарча хана, ГӀалгӀайчера тоадара-меттаоттадара тоаба Молочанскерча Ӏаьдала новкъостал деш я, цига бахача наьха вахар аттача доаккхаш. Болхлоша нувхаш чутувса контейнераш Ӏооттае майдаш хьалъю. ХӀанз Шевченко урам тӀа балхаш дӀахьош да, цига хьалхагӀа гӀишлонхоша массехк уж мо йола майда хьаяьяр», - аьлар «Сердало» газетага ГӀалгӀайчен гӀишлошъяра Министерствос.

Из лоархӀаме гӀа ба, Молочанска керттерча урам тӀа лостам бара боаккхаш бола. Нувхаш чукхувсаш йола контейнераш оттаяро, лостам лоаттабарал совгӀа, Ӏалама хьал а тоадергда.

Ерригаш а 80 майда хьае лаьрхӀад, къаьстта нувхашта лаьрхӀа йола контейнераш цига латтаргйолаш. Уж урама тайп-тайпарча моттигашка хургья, масса болча бахархошта дӀакхоачаргйолаш. Контейнераш каст кастта чура йоассаеш, цӀенъеш лелаергья, санитарни боарам, бокъо лораеш.