Гӏалгӏайчено шийна хетар дийцар театра хургдолчох, Шолжа-Гӏалий тӏарча кхетачене
Шолжа-Гӏалий тӏа чакхъяьлар Къилбаседа Кавказа театральни кхетаче, из хетаяь яр Россе 2035 шерга кхаччалца театральни искусство дегӏаахара хьал тоадарах. Гӏалгӏай Республико дика дакъа лаьцар, цу даькъ тӏара хьал дегӏадоаладарах шоашта бакъахьа хетар оалаш. Из хоам «Сердало» газетага бир мехка культуран Министерстве.
Кхетаче гулвелар 150 совгӏа говзанча; цу юкъе театрий, дешара моттигий, ерригача Къилбаседа Кавказа федеральни куран культура лелаю викалаш а болаш. Гӏалгӏайчен викалашта хьалха латташ яр республикан театра болхлой вӏашагӏтеха йола культуран министра гӏонча Куртой Макка.
Дувца оттадаьдар керттера дешаш: паччахьалкхено дӏадехаш дола болх вӏашагӏтохара керттердараш белгалдар, театра искусствон «Россе керттера темаш», иштта Россе театра болхлой Союза 150 шу дизарга кийчо яр.
Цул тӏехьагӏа, РФ культуран министра гӏончас Першин Сергея белагалдир театро мехка культуран хьал чӏоагӏдара юкъедахьаш дола дакъа, хӏаьта РФ СТД кулгалхочо Машков Владимира белгалдир моттигашка из болх дӏабахьар лоархӏаме долга.
«Кхетаче дакъа лацаро Гӏалгӏай Республиканна таро елар, российски театра хургдолчунна шоашкара дакъа юкъедахьа. Тхо тешаш да, тхоай балха говзало, иштта оаха хьалхадаьккхачо, вай республике санна берригача мехка а кердача боарам тӏа бала таро лургхиларах!» - аьлар Куртой Маккас.
Кхетаче лоархӏаме я балха говзал дӏа-юха эцара, театра искусство дегӏайоалаеча, Гӏалгӏай Республике санна берригача мехка а.
