ВДНХ сцена тӀа, цхьан сахьата ах сахьата шоай программа гойтаргья «ГӀалгӀайче» яхача паччахьалкхен халкъа халхара ансамбло, цул тӀехьагӀа цо говзанч-хьехам а лургба. Тамашийна йола, вай къаман культура гойтаргья цига истинг-кӀувсаш дераша, иштта цига го таро хургья къаьнара халкъа ашараш лийкха пандараш, уж таханарча говзанчаша юха хьакхеллад. Кулга говзал йолча говзанчаша гойтаргба вай къаман тӀабувхабу гӀирс, иштта чӀоагӀача дахчах яь хӀамаш. «Концерт луш далар, лезгинка оалача халхарца бувзабенна говзанч-хьехам балар, вай къаман пандарашца иллеш алар, чӀоагӀа эшаш да цига. Цу тайпара кхетаченаш хиларо таро хулийт къаман исбахьален оагӀонаш йовза, уж цӀагӀа меттел, арахьа дахача къамашта а дӀайовзийта, ГӀалгӀайчен пхьараша хьадаь тамашийна балхаш дӀагойта, моттигера культурнан тӀехьале дӀайовзийта. Цу тайпара гойтам дӀабахьар чӀоагӀа лоархӀаме да, бизнес шоайла дӀа-юха лелаяра хинна а ца Ӏеш, говзанчашта юкъе культуран бувзамаш кхоллара», - аьлар ГӀалгӀайчен Кулгалхочо Келаматанаькъан Махьмуд-Ӏаьлас, хургболча боккхача гойтамах дувцаш, вай мехко цига дакъа лоацаш хилар белгал а деш. Халкъашта юкъерча «Росси» яхача гойтама-кхетачен программо белгалъю массехк оагӀув, цо таро хулийтаргья экономикан, боахамий кулгалхошта, Россе моттигашкарча кулгалхошта тӀеххьарча шерашка эггара чӀоагӀагӀа шоаш даьхача толамех дувца.