Россе Къулбехьен къамий спортах, культурах йолча XV-ча фестивале дакъа лаьцар вай республико
Нохчий мехка дӀайихьача Къулбехьерча къамий культурах, спортах йолча XV-ча фестивале дакъа лоацаш хилар вай мохк. 16 моттигера лакха начӀал, говзал йола нах гулбаьбар фестивало укх шера. Тайп-тайпарча къамий истори, культура, оамалаш йовза, керда доттагӀал хотта аьттув баьлар гулбеннарий.
«ГӀалгӀай къаман тайп-тайпара дола говза балхаш гойташ хилар цига вай лакха начӀал дола говзанчаш Оздой Лида, Совтанаькъан Аьсет, Цхьорой Ювсап, Галай Адам, Цхьорой Аюп, иштта паччахьалкхен музея болхлой Ахтоланаькъан Тамуси, Хамхой Роза, Конциганаькъан Шейхудин. Къаман даараш, фертах даь кӀувсаш (истингаш), аьшкапхьара балхаш, иштта кхыдараш гойтар цар гулбеннарашта», - дийцар «Сердалога» культуран гӀулакхех йолча Министерствос.
Кхетаче дакъа лацаро къамашта юкъера бувзам, барт чӀоагӀбу, начӀал дола нах бовзийт.
