«ДӀадахарий ноахалаш» яха ерригача Россе болам хьаллаьцар вай мехка
Фашист ший низах вохавеш, вай лаьтташкара аравоаккхаш кхаьчача Коталон 80 шу дизара хетабаь «ДӀадахарий ноахалаш» яха ерригача Россе болам хьаллаьцар республикерча Росгварде болхлоша. Из хоам «Сердалога» бир цу моттигера. «Дешархошца дӀайихьача кхетаче дийцар къаманна тӀалоаттадаьча Ӏазапах.
Росгварде болхлоша берашта дийцар, цхьаккха бехк боацаш, бокъо йоацаш, къаман тӀаенача халонах, цу юкъе хиннараша текхача Ӏазапах», - йоах тхога бенача хоамо. Истореца дувзаденнача берий хаттарашта жоп делар.
«Вай мехка хӀара вахархочоа довза дезаш да, цу хана лаьтта къизал цхьаккха бокъо йоацаш хиннилга, немций-фашистий эскаро шоаш дӀалаьцача лаьтташка леладаьр дицде йиш йоацилга, истореца из массахана дахаргдолга», - белгалдир полице майор, Росгварде оагӀон кулгалхочун гӀонча волча Исмейланаькъан Аслана.
