ГӀалгӀайчено дакъа лоацаргда «ЦхьоагIо – дагалоацамца. Низ – деналца» яхача боламе
Маьтсела бетта 5-ча дийнахьа вай республика дакъа лоацаш хургья «ЦхьоагIо – дагалоацамца. Низ -деналца» яхача Ерригроссийски боламе. Из хетабаьб Сийлахь-боккхача Даьймехка тӀем тӀа Котало яьккха 80 шу дизара. Наьсарерча цӀермашиннаькъа станце юхасоцаргба Россе Герзашцарча низий Министерствон ше морг кхы боаца агитпоезд, из дӀа-юха лела музей я.
Цӏермашина чудоагӀаш хургда тематически гойтамаш, цар довзийтаргда тӀема шерашка хиннача техника сурташ, цар кепаш, иштта тахан Украине дӀахьош болча тӀема техника. Агитпоезд наькъа леларгба 75 дийнахьа, цу юкъа из чакхбаргба 75 Россе моттигашка гӀолла. Юкъара хьаийцача цо беш бола никъ ба 33 эзар км.
«Оаха доаккхал ду вай мехкахоша Котало йоаккхача юкъе дакъа лацарах, цул совгӀа геттара дика хет цу болама чубоагӀаш «ГӏалгӀай Турпалхой» яха гойтам хургхилар, цига дувцаргда деналах, майралах, тӀема наькъ тӀа карагӀдаьннарех», - аьлар ГӏалгӀайчен кулгалхочо Келаматанаькъан Махьмуд-Ӏаьлас, ше цох дувцаш.
Иштта дукха ха яц вай республика «Котало» яхача ретро-цӀермашина накъаяха хинна. Хӏаьта тушола бетта ГӏалгӀайче цхьаькха а цIермашин ера - «Коталон ЦӀермашин» яр из, дӀа-юха лела музей шийца йолаш..
