«Коталон миха» яха болам хьаллаьцар вай республико
27.02.2025 13:42
«Коталон миха» яхача болама юкъе хургба вай мохк бӀаьстан шоллагӀча бетта. Сталинграде лира тӀом латтача хана, унзарча хьале этта, яха йисача миха чӀонаках хьайолаяь гаьнаш дӀайогӀа лерхӀ МагӀалбике.
Денала га хинна дӀаэттай исторе 100 шу совгӀа ха йола из га. Дукха пхорч деттаденна хинна из 1943-ча шера шахьар мукъаяьккхача юха баьццарйийрза дӀаэттай.
«Денала миха лаьттай Сталинградерча къемата духьала. Вай бӀухошта денала куц гойташ, къизала духьала лаьттай из. Селлара толхаяь йоллашехь, юха дийнъенна, массане дегаш ураоттадеш, ший ха дӀахойихьай цо», - белгалдир вай Мехкадас Келаматанаькъан Махьмуд-Ӏаьлас цу боламах дувцаш.
«Коталон Миха» эггара хьалха вай мехка 2017-ча шера Наьсарерча дагалоаттама, сийлен Мемориале дӀаегӀар.
