13 млн ахча гулдаьд вай мехка, Палестине бахача наха лаьрхӀа
20.11.2023 12:37
«Тешам», «Дикача наьха клуб» яхача наха гӀо деча ганзаша 13 миллиони 177 эзар сом ахча гулдаьд, Cектор газа яхача моттиге халача хьале эттача бусалба наха. Из хоам «Сердало» газетага бир «Тешам» яхача моттигерча болхлоша. Ахча гулде аьнна болам кхайкабаьча 4 дийнахьа вай мехкарча наха даь новкъостал да из. Шоай таронга хьежжа гӀо де гӀерт хӀаравар.
«ХӀаравар ший низ дӀа ма кхоачча гӀо де гӀерт цу мискача бусалба наха. Вай къаман бизнесменаша 1 млн 800 эзар соми, мах бола генератораши еннай царна дӀаяхьийта. Селхан уж хӀамаш дӀа-хьа нийсъеш, новкъостал дир студенташа, дешархоша», - дийцар тхога «Дикача наьха клуб» яхача моттига викалаша.
