ГӀалгӀайче хьалха я дуккха хӀама цхьана дохкар дегӀакхувлача
ГӀалгӀайче хьалхара моттиг йоаккхаш я Россе гӀолла оптови оалача кепара хӀамаш йохкаш хилара даькъ тӀа, цо гойтар 94,6 % тӀакхийтта хилар, 2024 шера хинначунца нийсдича, аьлар «Сердало» газетага республикан Кулгалхочун зарбан болх лелабераша.
Цу тайпара толам баккха таро хилар моттигерча Ӏаьдало даим болх дӀахьош хиларах, иштта къайлагӀа лелабу доалахьара болх гучабоаккхаш къахьегарах. Цул совгӀа, мохк дегӀабара деш дар хӀара денна тӀакхеташ да, хӀаьта административни новкъарленаш ца хиларо доалахье лелаерий хьалаш тоаду. Из бахьан долаш, бизнес ший болх дикагӀа вӀашагӀболлаш я «къайлагӀа» из хургбоацаш, законо дӀадеххача тайпара болх бара.
ГӀалгӀайчен кулгалхочо Келаматанаькъан Махьмуд-Ӏаьлас белгалдир, даьхача толамаша хьагойта паччахьалкхено хержа никъ нийса болга.
«Административни даькъ тӀа нийслуш дола кхоачамбоацараш юхадахара, экономикан хьал къаьгга хилийтара деш дар накъадоал инвесторий тешам хургболаш, цо кӀийле ю дегӀадара хьал тешшаме де», - аьлар мехкадас.
Келаматанаькъанчо иштта тӀатехар, республика даьхача толамаш тӀа саца лаьрхӀа цахилар, цо дӀахо а болх бергба экономика дегӀайоалаяра тӀехьа, керда инвестицеш юкъейоахаш, цо таро лу ГӀалгӀайче дегӀайоалае.
