Дика наькъаш долча Россе пхе моттига юкъе я вай республика
Наькъий хьал тоадеш йолча Россе моттигашта юкъе, йизза моттиг хьалоацаш я вай республика а. Укх тӀехьарча шерашка наькъаш меттадоаладеш, мехка дӀахьош латтар боккха болх ба. Боккха федеральни никъ боацаш, юрташта, кхалешта, шахьарашта юкъера наькъаш эргадоахаш къахьег мехка.
«Наькъий хьал дика долча моттигашта юкъе хьалхарча мугӀаре латт Москва, 100%-га кхоачаш тоадаь да цигара наькъаш. Иштта цу юкъейода Ханты-Мансийски автономни округ - Югра, Челябински область, вай республика, Краснодар. Хила безача боарама хьал теркалдича, 82% - гара 89,4%-га кхоачаш ба цигара цу оагӀонцара болх.
Геттара чӀоагӀа, сома наькъаш дехкарца белгала я вай республика (дукхагӀа йоккхача шахьарашка мара дац - Москва, Санкт-Петербург, Севастополь)», - йоах тохкама болх дӀабихьача хоамий моттиго.
Белгалде деза, тахан вай мехка дукха наькъаш, тӀаьш, иштта кхыйола моттигаш тоаеш боккха болх дӀахьош латтилга. Шахьарашкара, юрташкара наькъаш эргадоахаш ба вайцига.
