Кагирхой бизнесах Россе дикагӏча 7-на юкъе ба вай мохк
Кагирхошта юкъе бизнес йоаржаеш болх дӏабахьарах йолча Россе ворхӏ моттига юкъеяхар вай республика. 86-ча моттигера 7-ча моттиге эттар из карарча хана. «Сердалога» из хоам кагирхой гӏулакхех йолча министерствера бир.
«Кагирхошта юкъе «Роскагирхой. Къахьега» яха программа йоаржаеш, болх дӏабахьарах белгалбир вай мехкахой. Кагирхой цхьанкхетарий Цӏен болхло волча Гӏалменаькъан Саӏида тӏадиллар из гӏулакх. Тоабанца керда бизнесменаш ӏомабеш йола программа йоаржаеш къахьийгар цо», - дийцар тха газетага.
«Цхьан шера кхоачашде аьттув баьннар кӏезига дацар. Вайна бӏаргадайра, мехкара кагирхой шоай хӏама доладе хьагаш хиларал совгӏа, цхьацца болх дӏахьош, аьттув болаш дӏаболхаш болга», - аьлар кагирхой гӏулакхех йолча Комитета кулгал деча Малсаганаькъан Адама.
