ГӏалгӀайче эггара хьалха гуллургба берригача мехкара Ӏаддалхой
ГӏалгӀайче духхьашха гуллургба «Россе халкъа доттагӀал» яхача ӏаддалхой яхьашка вай мехка тайп-тайпарча миӀингашкара нах. Из хоам «Сердало» газетага бу из болх вӀашагӀбеллараша.
«Из хоза кхетаче дӀайолалу, саькура бетта 10-ча денгара 13-ча денга кхаччалца «Мужече» яхача спортивни- унахцӀенон центра даькъ тӀа. Кхетачен программан хьалхарча дийнахьа спортсменаш чакхбаргба дӀачубитара йолча комиссега гӀолла, лаьрххӀа йолча кийчонах, технически кхелах. Тӏеххьарча шин дийнахьа Ӏаддалхоша шоашта фу карагӀдоал гойтаргда, иштта яхьебаргба совгӀаташ дахара. Бокъонах турнире дакъа лаца таро йолаш ба 2-ча разрядал лохагӀа боацараш (ондаргаш, маӀа нах, кхалнах), яхьаш я классически Ӏадсаькх кхоссараха, блочный классах, баребоух.
«Оаха доккхал ду цу тайпара яхьаш ГӏалгӀай Республике дӀахьош хиларах, уж хьалхара дӀахьош я, хӀара шера дӏахьоргйолаш а я. Оаха цунна цӀи еннай «Россе къамий доттагӀал», хӀана аьлча ер шу Россе хьакхайкадаьд мехка къамий цхьоагӀон шу да, аьнна. Яхьаш чуйоагӀаш я спорта Министерствос 2026 шера оттаяьча плана. Белгалдаккха лов, цу яхьашка оаха спорта мастера кандидата, Ӏадсаькх кхоссарах Россе спорта мастер яха цӀераш лургья. Цу оагӀоно «Къамий доттагӀал» яхача яхьий лерхӀам лакхагӀа бу», - аьлар ГӏалгӀай Республикан Ӏадсаькх кхоссара, герз нийса кхоссара (арбалет) Федераце президента Йовлой Анзора.
Белгалду, яхьаш дӀахьош я Россе машинашъерий Союза моттигерча отделене хьаллоацаш, цун тӀахьожаш ва Оздой Бек-хан - герза, герза гӀирса, лаьрххӀача химе Паччахьалкхен «Ростех» корпораце кулгалхо.
