Магӏалбик-Шахьара №20 йолча ишколе, эскаре тӏахьехарий Денна хетаяь кхетаче хилар
Магӏалбикерча №20 йолча ишколе, мехкагадоаккхарий вӏашагӏкхетар хилар, из хетадаь дар эскаре тӏахьехарий Ди дездеш хиларца дувзаденна. Кхетаче дӏахьош хилар «Даьхен лорабой» ганза филиала доакъашхой. Цун керттера бахьан дар дешархошта граждански декхар довзийтар, тӏема амалцара лерхӏам кхебар.
«Кхетаче дӏахьош дакъа лоацаш хилар СВО ветеран Ӏаьленаькъан ӏаьла, Гӏалгӏайчен Халкъа Гуллама депутат Дарсиганаькъан Мухьмад, «Исторически дагалоаттам» яхача партийни проекта моттигера болх лелабу Муружанаькъан Мухьмад, «Мехкахо» яхача тохкамаш деча тоаба кулгалхо, «Къонача эскара» моттигерча штаба кулгалхо, «Даьхен лорабой» ганза филиала вахара оагӏонцара болх лелабу Доданаькъан Ибрахӏим, иштта шахьара Кхела кулгалхо Йовлой Ӏусман.
Гулбеннараша къамаьл дир дешархошца, царна вахара нийса хьалаш хьалхадоахаш, шоай говзал царца йийкъар, цар иштта дийцар Даьхен гӏулакх дарах, цунна хьалхашка бехктокхаме хила безарах», - аьлар «Сердало» газетага «Даьхен лорабой» ганзе.
Программе керттера моттиг дӏалоацаш дар, лаьрххӏача тӏема операце бӏухой турпалча гӏулакхех, деналах лаьца хинна дувцар. Цу вӏашагӏкхетаре дешархошта дайзар боккъонцахьа болча бӏухошта карагӏдоалаш дола доккхий тӏема гӏулакхаш, цар денал.
Из кхетаче вӏашагӏъеллача наха яхачох, цо таро лу кагирхой сакхетам совбаккха, шоайла лерхӏам хилийта, машара мах бовза, иштта мехкахошта карагӏдаьннар дагалоаттаде.