Гӏалгӏайчено хьагойтар Россе Банка баьча онлайн-тохкамцара дикагӏчарех цхьа толам
Ардара бетта Россе Банка ӏХ-гӏа Ерригроссийски онлайн-тохкам болаш, ахча леладе хара даькъ тӏа ше дикагӏа йолча пхе моттига юкъебоагӏаш хилар чӏоагӏдир вай мехко, Рязански, Белгородски, Орловски областашца, Бурятеца, яхаш, дийцар «Сердало» газетага Гӏалгӏайчен Паччахьалкхено.
Из хьал довзара болх дӏабихьар ардара бетта 6-ча денгара 27-ча денга кхаччалца fӏnzachet.ru портала тӏа, цунна чувоагӏаш хилар 2,5 миллион россе вахархо, уж дӏадахача шера 2,3 мара бацар.
Гӏалгӏайчен бахархоша гойтар шоаш дика кийчо яь хилар- из декхар дика кхоачашдир республикан доакъашхошта юкъерча 85% сага. Дезала хьисапера уж хаттараш кхоачашдеча дакъа лоацаш хилар 582 республикан фусам, царех 97% йолчар уж деррига хаттараш кхоачашдир.
Гӏалгӏайче гӏолла йолча Россе банка отделене кулгалхочо Зайцев Вадима яхачох, республике из хьал дика латташ хилар гойтарал совгӏа, из дика леладе ховш хиларо а цецвоаккх. Цо яхачох, дешархоша, бӏарччача дезалаша гойтар республикан хӏара денна дӏахьош долча вахаре ахчанца леладу гӏулакх ца хайча даргдоацаш долга.
Зачёт дӏалуш оттадаь хинна хаттараш таханарча хьалашка хьежжа дар. Доакъашхой шоай доалахьара ахчан хьал нийса леладе ховш хилар гойта дезаш бар, цул совгӏа шоай телефонаш тийшача балхах лораяр, мах беш нах ӏехаберех лоравалар а цунна чудоагӏаш дар. Зачёт дика дӏаеннарашта цӏи тӏатеха сертификаташ делар, цу темах бола хьехам бир.
Цу тайпара хьехамаш дӏадахьаро таро лу шоай дӏадодар го, шоашта тийшаболх бой ха. Иштта болх нахаца дӏабахьаро Россе Банка таро хулийт к ахча леладара халагӏа йола оагӏонаш белгалъе, мехка малагӏча моттигашка из кхетам балара болх дӏабахьа безаш ба дукхагӏа.