Гӏалгӏай ноанал, культура ювц «Россе чамаш» яхача фильмо
26.09.2025 14:18
Къаман ноанал, цӏагӏа леладу гӏирсаш керттера хилар «Россе чамаш» яха документальни фильм хьакхоллара, из Гӏалгӏай мехка доаккхаш да Федераце Совета «Цхьана-РФ» яхача телеканала болхлоша. Царна из даккха новкъостал ду республикан Миннацо.
Цу министерствон зарбан болх лелабераша яхачох, Имагожанаькъан Ахьмада дезале фильм доаккхаш болх дӏабихьар, фусам-даьша гойтар хьалхарча аргӏагӏа гӏалгӏай хьаша-да тӏаэцар миштад: дег чура доагӀа гӀадвахар, даарех диза истол. Истола тӏа багӏаш хьаьшашта дувц къаьнарча даарий боарамах, уж мишта кийчду, тайп-тайпарча Ӏадатех.
Цул тӏехьагӏа, фусам-дас, пхьоаллен говзанчас, хьаьшашта йовзийтар ший цӏагӏара музей, ше хьаяь хӏамаш санна, тамашийна къаьнара гӏирсаш.
