Гӏалгӏай ахархой дика лоархӏабу гуйранарча балхех
Гӏалгӏайче дика дӏахьош да гуйранара юртбоахама балхаш, 2026 шера хургбола хьувкъам дӏабувш. Мехка ахархоша тӏеххьара беча хоамах лаьрхӏа хиннар кхоачашдаьд 57%, дӏаде лаьрхӏача 26,6 эзар гектар ялатах, хӏанз дӏадийна даьннад 15,3 эзар гектар,яхаш, дийцар «Сердало» газетага Гӏалгӏайчен юртбоахама Министерстве.
«Карарча шера дукхагӏа дӏаде лерхӏаш дар гурахьа дӏадувш дола ялат. Кӏа дӏаде лаьрхӏад 18,4 эзар гектара тӏа, ӏан кӏалбода мукх - 5,4 эзар гектар, гурахьа ювш йола рапс - 2,7 эзар гектар. Цу тайпара кхай тӏара болх чакхбаккхаро таро лургья хьатӏадоагӏача шера дика хьувкъам чуэца», - аьлар хоамо.
Республикан боахамашка дика ӏалашо яьй кхашкара балхаш дӏадахьара эшачунца. Доагора, фун ӏалашо яьй боахамашка 100%, хӏаьта баьцовгӏаш лораяра хӏамашца - 90%. Деррига балхаш графиках доаггӏача беса дӏахьош да, уж шоай ханнахьа чакх а доахаргда. Из болх дӏахьоргба, лайчилла бетта 20-ча денга кхоачаш. Гӏалгӏайчен ахархоша шоашта хьалхашка латта декхараш кхоачашдергда 2026 шера дика хьувкъам хургболаш.
