Гӏалгӏай боксёраша сий долаш чакхъяьккхар СКФО Хьалхале
Гӏалгӏай боксёраша дика толамаш даьхар, Къилбаседа Кавказа федеральни куран Хьалхале яккхара яхьаш дӏахьош, уж хилар Ставрапольски края Суворова станице, яхаш, хоам бу «Сердало» газетага.
«Гӏалгӏайчен гулъяьча тоабо дика толам гойтар, 17-18 шераш даьннача ондаргашта юкъе яхьаш дӏахьош. Бӏарчча кӏира СКФО тайп-тайпарча моттигашкара тӏоарска кулгахйоаллорга говзанчаш къовсам дӏахьош хилар. Профессиональни говзал дика хиларах лакхарча лагӏа тӏа ваьлар Тагиров Хыйса ( 67 кг). Лоархӏаме дакъа цу юкъе дӏалоац цар тренераша Дзовранаькъан Мухьмада, Зангенаькъан Ибрахӏима. Овшанаькъан Ӏаддала (60 кг) дошо совгӏат даьккхар. Яхьашка ондарг кийчваьраш ба Овшанаькъан Тимур, Малсаганаькъан Руслан, Боканаькъан Хьусен», - йоах хоамо.
Цул совгӏа, Баьзенаькъан Ӏаддал- Малика (67 кг) яхьаш чакхйоалаш дото майдилг яьккхар. Янданаькъан Муслима (57 кг) иштта Малсаганаькъан Хьамзата (63,5 кг) кхоалагӏа моттиг яьккхар.
