Вай спортсменаша республикан сий даьккхар
Санкт-Петербурге дӀайихьача, «Кхувш латта седкъий» яхача эллиной-румий латарах Кубок яккхара йийллача яхьашка дакъа лоацаш хиннача вайцигарча гулъяьча тоабо, ший мохк дикача оагӀорахьара дӀабовзийтар. Цу хьакъехьа «Сердало» газета корреспондентага дийцар белгалдаьча латара ГӀР федераце.
«Ади Ахьмад» яхача спортивни клубе кхувш боагӀача кагирхоша тайп-тайпара лоархӀам бола майдилгаш яьхар. Шийдар мо 32 кг дозал дарашта юкъе, дошо майдилги чемпиона тӀехкари даьккхар Мейренаькъан Ахьмада.
Къоастой Рахьим дозал 57 кг дарашта юкъе шоллагӀа хилар. ХӀаьта УмаевгӀар Руслана кхоалагӀа моттиг яьккхар. Царна хьалхаваьнна яхьашка вахавар хьехамча вола Ӏарапханаькъан Ислам, яхаш, хоам бу тхога.
Белгалдаккха деза, «Кхувш латта седкъий» яха яхь дӀахьош яр 16 шерга кхаччалца болча ондаргашта юкъе. Уж бар Россе 22 моттигера, Казахстанера, Белоруссера, Узбекистанера.
