ГӀалгӀайчен каратисташа Шолжа-ГӀалий тӀарча яхье латара говзал гойтар
ГӀалгӀайчен спортсменаш, Шовхаланаькъан Ӏаддал-Ӏазиза кулгалца, коталон моттигаш яьхар каратэх Нохчий Республике дӀахьош хиннача дерригача дозалий къовсамашка, яхаш, дийцар «Сердало» газетага ГӀалгӀай Республикан спорта Министерствон зарбан болх лелабеча ГӀаппархой Аишас.
Шолжа-ГӀалий тӀа дӀахьош хиннача яхьашка дакъа лоацаш бар мехка тайп-тайпарча моттигашкара каратисташ. Вай мехкахошта юкъе дика толамаш даьхар Ноакастхой Адама (дозал 84 кг долча 18-20 шу даьннарашта юкъе), Шовхаланаькъан Ахьмада (16-17 шу, дозал 76 кг), Саккхаланаькъан Сулеймана (42 кг,Ӏ0-11 шу), Къамурзой ИбрахӀима (дозал 36 кг,10-11 шу).
Цул совгӀа, дото совгӀаташ делар Коазой Амира (55 кг,14- 15 шу).
Угурчанаькъан Мухьмада (36 кг,12-13 шу), Пхьиленаькъан Ӏумара (54 кг, 12-13 шу).
Янданаькъан Хьамзас (14-15 шу) борза совгӀат даьккхар, 48 кг дозал долаш.
