Университете йийллача наӀарий Ди хургда
ГӀалгӀайчен паччахьалкхен университет лаьрххӀа йола кийчо еш я, йийллача наӀарий Ди дӀадахьа. Из хургда бекарга бетта 18-ча дийнахьа, цу дийнахьа безам болаш вар ГӀалгӀайчен лакхерча дешара моттиге ваха йиш йолаш ва. Кхетаче дӀахьоча баьхкача хьаьший шоайла дӀа-юха бовзар хургда факультетий, колледжий, ГӀалгӀайчен паччахьалкхен университета кулгалхошца, иштта цига йиш хургья университета дикагӀбола студенташ бовза.
«Йийллача наӀарий Ди дӀахьош, деша отта безам барий даьй-ноаной таро хургья ИнгГУ малагӀа говзанчаш кийчбу ха, цу дешарах хьабоала пайда бовза, иштта цар хаттарашта жоп а лургда», - аьлар «Сердало» газетага ГӀалгӀай паччахьалкхен университете.
Кхетаче дӀахьоча юкъа ИнгГУ еррига таронаш го йиш хургья: дешара корпусаш, студенташ бахаш йола юкъара вахара моттиг, спортивни, культурни оагӀонаш.
Студенташа дувцаргда царна университетал арахьарча вахарах, шоай мукъа ха дӀахьош хиларах, шоаш спортивни кхетаченашка малагӀа дакъа лоац, Ӏилма-тохкама болх мишта дӀахьу.
