Россе антропологий, этнологий конгрессе дакъа лаьцар вай историка
Россе этнологий, антропологий XVӀ-ча конгрессе дакъа лаьцар гӀалгӀай историка Хьулахой Алёнас. Укх беттарча 2-ча денгара 6-ча денга кхаччалца Перме дӀайихьар кхетаче. Пермерча Коми-Пермяцки оагӀон – СССР эггара хьалхарча къаман куран Ӏ00 шу дизара хетаяь, « Даьхен истори» яхача ганза хьаллоацаш, дӀахьош кхетаче яр из.
Вай мехкахочо, Хьулахой Алёнас йийшар цига «Къаьнара, керда Кавказера доазош: культура, цунца дувзаденнараш» яха доклад. ХХ-гӀа бӀаьшере юхекхаьчача хана; керда яьннача модаша Ӏоткъам беш, 1980-1990-ча шерашка гӀалгӀай къаман юкъе леладаьча нускала чокхеца хиннача цхьацца долча хувцамех дийцар вай мехкахочо.
Конгресса пхелагӀча дийнахьа Алёнас дакъа лаьцар «Къилбаседа Кавказерча къамий мехкал арахьара викалаш» яхача, ГӀаьбартой - Балкхарой мехкарча Ӏилман болхлочо, Аккиева Светланас даьча къамаьлага, исторически Ӏилман доктор йолча Рамазанова Дильшада кулгал деш хиннача секце.
Кхетаче кийчъяьраш бар абхазски, российски историкаш, Кавказа этнологехи антропологехи йолча Миклухо-Маклай Н.Н. цӀерах йолча института Ӏилман болхло Анчабадзе Юрий, исторически Ӏилман доктор, Кавказа МАЭ РАН этнологех болча оагӀон Ӏилман болхло йолаш къахьегача Албохчанаькъан Макка.
