Даьймехка бӀухой дезалий Гӏалгӏайчен Комитето тӏемхошта концерт делар
Даьймехка бӀухой дезалий ГӏалгӀайчен Комитето; Кердача шерца, Христос Варца дувзаденна вӀашагӀделлар, республике латтача Россе герзашцарча низий Министерствон 503-ча мотострелкови полка эскархошта лаьрхӀа концерт. Из кхетаче дӀахьош хиларца баркал аьлар, хӀара денна атта доаца декхар кхоачашдеш, вай мохк лорабеш ха тӀа латтарашта. Тӏема гӏулакха чоалханерча хьалашка геттара эшаш да, цу юкъе наха дакъа лацар, цар терко яр. Къаьстта из кхетаче вӀашагӀъеллараш хьежар из йӀовхал яла бӀухошта.
«Цӏай-концерт дӀахьош дакъа лоацаш хилар Шолжа кхалерча, Эбарга-Юртарча культуран цӏеной начӀал дола артисташ, цар йитар бӀухой дегашка йӀовхал, сийрда уйлаш. Цар халхараш дир, иллеш аьлар, гулбеннарий самукъадоаккхаш. Цига дакъа лоацаш хилар ГӏалгӀайчен культуран цӀихеза болхло Гарданаькъан Шамал, Мерашканаькъан Рита, Китенаькъан Жанна, Балай Мухьмад, иштта берий «Сийг» яха халхара ансамбль», - аьлар «Сердало» газетага ГӏалгӀай Республикан КСВО кулгалхочо Эсамарзанаькъан Ӏалаудина.
Иштта цига баьхка хилар мехка Кулгалхочун Администраце, Паччахьалкхен чурча политикан отдела кулгалхо Гӏазданаькъан Рустам, КСВО моттигерча штаба кулгалхочун гӀончаш Гаьгенаькъан Илез, Гӏулой ИбрахӀим, ГӏалгӀай Республикан КСВО юкъарлонца бувзама болх лелабу Чуранаькъан Дауд, Шолжа-Шахьара КСВО штаба кулгалхо Гӏулой ИбрахӀим.
Цӏай чакхдоалаш, Эсамарзанаькъан Ӏалаудина баркал оалаш, грамоташ елар, баркал аьлар Даьймехка бӀухой дезалий Комитета болхлошта; цар юкъара гӀулакх а бӀухой а хьаллацарах, иштта артисташта а ловца баьккхар хоза цӀай дӀадахьарах. Цу кхетачен доакъашхоша шоай оагӀорахьа белгалдир, шоашта керттера совгӀат накъабоалаш хилар долга.
Даьймехка бӀухой деззалий Комитето дӀахьоча гӀулакхех гуш да, вай мохк лорабеш латтача бӀухошта гонахьа мел доккха оарц да, цо цӀаькхаза а хьагойт наьха а эскара а, шоайла хьаллоацаш, барт хилар, хӀара тӀема гӀулакх леладеш вола саг вай боккхача, барт болча дезала цхьа дакъа да.
