Вай латархочо дотув даьккхар, дунен хьалхале яккхара яхьашка
27.10.2025 10:16
Гӏалгӏай спортсмена Хоаной Мухьмад-Тӏахӏира ший лоӏаме кӏалкхетаргах латара U23 дунен яхьашка дото майдилг яьккхар. Укх шера цу яхьашка дакъа лоацараш тӏаийцар Сербе, яхаш, хоам бу «Сердалога» моттигерча спорта министерствос.
Шоллагӏча моттигага кхача гӏерташ, вай мехкахочо 4 латар чакхдаьккхар. Бахрейна викал цо эшавир чот 4:1 йолаш, Инде мехкарвар – 11: 0 йолаш, ах финале кхоачаш 12:1 йолаш котваьлар из Молдаверча спортсменал. Керттерча къовсаме чот 5:3 йолаш вай мехкахо ийшар иранцагара. Цу тайпара Мухьмад-Тӏахӏира шоллагӏа моттиг яьккхар дунен лоархӏамеча яхьашка. Цун дозал дар 92 кг.
