ГӏалгӀайчен бахархой хьажа таро я «Тхо цӀадоагӀаргда, нани» яхача спектаклага
03.05.2025 22:25
Коталон Ди долаш, ГӀалгӀай паччахьалкхен ашарий-драматически эрсий театро гойтаргья Боканаькъан Ахьмада «Тиша цӀа» яхача повестах оттаяь «Тхо цӀадоагӀаргда, нани» яха спектакль. Из хоам «Сердало» газетага бир театра зарбан болх лелабеча Султиганаькъан Ӏарбе.
«Хьажархошта гургда дог тохадолийташ дола, Даьхен лорбой цхьан цӀагӀара кхоъ волча фусамера хала вахар. Трагеде хьагойт бокъонца дола гӀалгӀай къаман викалаша Сийлахь-боккха Даьймехка тӀом лаьттача шерашка лайна хало», - аьлар хоамо.
Белгалду, театро из спектакль, духхьашха оттаяь, гойтар 30 шу хьалха. Цу хана Боканаькъан Ахьмада белгалдир, юхь ловзаерий болх дика вӀашагӀбелла хилар, иштта режиссёра лакха говзал йола къахьегам.
