Ший цӀи къайлайихьар Наьсарера кхо урам тоабаьча вахархочо
23.08.2024 16:47
Наьсаре кхо урам тоабеш болх дӀабихьар ший цӀи къайлаяхьар ловш волча вай мехкахочо. Из хоам «Сердалога» бир мехка кабмино.
«ЧӀоагӀа беркате болх ба из! Бахархоша хам беш, дуккхача шерашка ловцаш доахаргдолаш гӀулакх да из», - аьлар шахьара дас Йовлой Урусхана, цу сага баркал кхайкадеш.
Пионерски, Мира, Нурадилова оалача урамашка Ӏобиллаб асфальт, тоадаьд тротуараш. Белгалде деза, укх шера Наьсарера 11 урам, боккха болх дӀахьош, тоабаьлга. Къаман проекташка гӀолла, шахьарерча ганза рузкъах дӀабихьаб из болх.
