Дзюдох йолча Европа яхьашка, котало яьккхар Султиганаькъан Ислама
24.11.2025 10:39
Дзюдох йолча U 21 Европа яхьашка, котало йоаккхаш, белгалваьлар вай мехкахо Султиганаькъан Ислам. Яхьаш дӏайихьар Черногоре. Из хоам «Сердалога» бир мехкарча Минспорте.
«Укх беттарча 22-ча денгара 23-ча денга кхаччалца, Подгорица яхача Черногорен керттерча шахьарера хилар яхь. 200 совгӏа спортсмен вар цига гулвеннар. 66 кг дозалах белгалваьлар лакха начӏал дола вай дзюдоист Султиганаькъан Ислам», - йоах тхога кхаьчача хоамо.
«Ислама котало российски тоабанна лоархӏаме хилар. Турнирага дикка кийчо яьлга гуш дар спортсмено гойтача латарах», - дийцар тха газетага.
