Гӏишлон балхаш дӏахьош, къаьнара пхи сом корадир
Лаьлах яхача историко-архитектуран моттиге меттаоттадара балхаш дӏахьош, Гӏалгӏайчен вахархочунна корадир тамашийнача пхе сома каьхат, из да 1909 шерара. Из мах бола къаьнара ганз корайир цхьан тӏема гӏалан чу кирпишк йоттача балха юкъе. Коазой Нурдина хоам бир Жайрахьа-Ассински паччахьалкхен историко-архитектуран, ӏалама музея-заповедника болхлочунга Гӏуражанаькъан Заьудинага, из вар аргӏанара Лаьлах гӏалай комплекса даькъ тӏа цу дийнахьа болх дӏахьош.
«Цу тайпара моттиг нийсъяларо таро лу цу ханара экономически, вахара хьал довза. Цул совгӏа, цо дикка дакъа юкъедахь архитектуран исторически кеп вӏашагӏйолла а из юха хьакхолла а. Кастлуш из ахчан кеп дӏалургья Гӏалгӏай паччахьалкхен Малсаганаькъан Тухана цӏерагӏча музее, цига говзанчаша из лорадара дола хьалаш хьакхолларгда», - аьлар «Сердало» газетага Гӏалгӏайчен Жӏайрахьа - Ахабоарзен музее-заповеднике.
Цо цӏаькха а хьагойт Гӏалгӏайчен меттаоттадара балхаш дӏадахьара лоархӏам боккха хилар, цу тайпара моттигаш кхы а хургйолга чулоацаш.
