Композитора вӀашагӀкхетар хилар, МагӀалбика къонача актёрашца
Магӏалбика культуран Цӏен культурно-дешара программо йицлургйоаца кхетаче йир къонача артисташта цӀихезача ГӏалгӀайчен искусствон болхлочунца. «Маьлха зӀанараш» яхача театра берий студе Ӏомалура таро йолаш бар дика вовзаш волча ГӀалгӀайчен ашархочунца, композиторца, республикан культуран цӀихезача болхлочунца Солтукенаькъан Амираца къамаьл де.
«Кхоллама кхетачен хьале дика къамаьл хилар говзанчеи, иштта дӀаболалуш мара боацача артистийи. Амира берашта дика дийцар ше юххьанца мишта дӀаволавелар, малагӀа ашараш араяьлар, мукъам хьакхоллаш малагӀа къаман тӀехьален лостам хила беза таханарча искусстве. Цунга, геттара безам тӀабодаш, ладувгIаш дар бераш, из царна дика вовзар композитор, ашархо хиларах тарра.
Къаьстта йола терко цу кхетачене тӀаяхийтар культуран Ӏадаташ лораде дезара, уж кхувш йоагӀача тӀехьенна дуташ хилара. Композитора белгалдир къаман тӀехьале лораеш хила везилга, сага кхолламе цо малагӀа дакъа лоац а белгалдир», - аьлар «Сердало» газетага из болх вӀашагӀбеллараша.
