Телевидене чардакха зIамига юбилей
Наьсарерча ГТРК вышка хьалъяь 25 шу дизад
«Сий» яхаш цхьа фаьлг ба вай халкъа багахбувцама юкъе. Цига цIи, сий, мух, хий дунен тIагIолла цхьана лела арадаьнна хиннад. ВIаший къасташ, цIеро аьннад, ше кIур боагIача хургья; михо аьннад, ше гаьнаш, баьцаш эгачара короргья; иштта кхы дIахо а. Нагахьа санна царца телевидени хиннаяларе, сона хеташ, цо аргдар, ше вышка ягIача моттигера лаха еза, аьнна. Тахан санна дагадоагIа сона, Наьсарерча ГТРК чардакх хьалъяь ха. Со цу хана, районерча «Наьсарен оаз» яхача газета корреспондент волаш, къахьегаш вар. Цох лаьца цхьацца йоазош дир аз наьсархошта лаьрхIа. Зама сиха йода, хаьхка вода говрбаьри санна. Из селхан хилча санна хете а, 25 шу даьннад ювцаш йола вышка хьалъяь.
Йоккха говзал йола «Петроавиамонтаж» яхача фирма болхлой бар из хьалъеш хиннараш. Цар хьалха даьча балхашта юкъе яр Ригера, Таллинера, дуккхача кхыча моттигашкара телевиденена хиланза яргйоаца гIишлош. Духхьала кулгашца, кранаца болх бича кхоачам хилацар укхаза, хIана аьлча чардакх 118 метрага дIакхоачаш лакха яр. Цудухьа из болх вертолёта новкъосталца бе безаш хулар. Москвера цу тайпара вертолёт хьаязъяйта ахча доацаш кIезига-дукха гайнабале а, телечардакх ший ханнахьа хьалъяь а яьнна, хIара фусаме ле йолаелар гIалгIай телевидени.
Из еча хана, бе-беча наьха теркам тIаозар сигаленгахьа бухь билла урагIйодача вышкас; царна юкъе бар мугIарера бахархой, журналисташ, сурташ дехка нах. Цу тайпара цхьа сурт дилладар профессора, филологически Iилмай кандидата Дахкилгнаькъан Iадрахьмана ИбрахIима. Телевидене селханара ди дага а дохийташ, шо цу суртага хьажа хьех аз.
Цу шера а гаргарча шерашка а хьалъяь мел хинна лоархIаме гIишлош дукхагIъяраш тахан болх беш яц. Бакъда вышка-м ягIаш я. Телевидени а я, ший болх тоабеш хьайоагIаш. Цу моттиго къаьстта гIадвуг. БIаь шера а кхы дукхагIа а яхийла телевидене белгало хинна латта Наьсарера чардакх!
