Коталон Денга кийчлуш я Магӏалбик
Коталон Денга кийчо еш бола болх мишта дӏабодаш ба хьажа араваьлар тӏема сийлен шахьар йолча Магӏалбика мэр Боканаькъан Мухьмад, шийца кхыбола болхлой болаш. Хьатӏадоагӏача цӏайга кийча хила езаш я Магӏалбик.
«Шахьара массайолча моттигашка кулг тохаш, зизаш, гаьнаш дӏаювш; къахьегаш ба тахан. Лаьрххӏа цу гӏулакхех вола дизайнер оттаваь, дӏахьош ба болх укх шера. Магӏалбика моттигаш бахархой бӏарг хьоасташ, дог гӏоздоаккхаш хила еза», - дийцар «Сердалога» Боканаькъан Мухьмада.
Къаьстта йоккха терко йир, Серго цӏерах йолча парка моттигашта. Эггара дукхагӏа адам гуллуш, кхетаченаш йоаржаеш йола моттиг я из. Массанахьа хьожаш чакхваьннача Боканаькъан Мухьмада цхьацца декхараш тӏадаьхкар ший болхлошта.
Коталон Ди дездар боаггӏача боараме дӏадахьа йиш хургйолаш, деррига гӏулакхаш ханнахьа чакхдаьха хила дезилга хьалхадаьккхар мэра.
