СВО ветеранашца, цар дезалашца кхетаче дӏайихьар Юкъерча Ачалкхе
Тӏема операцена юкъе вахар хаьдарий, де доацаш байнарий дезалашца кхетаче дӏайихьар Юкъерча Ачалкхерча культуран Цӏагӏа. Иштта цига баьхкабар дегӏа могашал эшаенна бола Юкъерча Ачалкхера, Лохерча Ачалкхера (Даби-Юртара), Йоккхача Ачалкхера ветеранаш.
«Кхетаче гулбеннабар Магӏалбикерча администраце, «Даьхен лорабой» яхача ганза болхлой, юрташкарча администрацешкара кулгалхой, депутаташ, иштта кхыбараш а. СВО ветеранашта, цар гаргарча наха хьалхашка нийслуш долча кхоачамбоацарех дийцар цига», - йоах «Сердалога» цу моттигера бенача хоамо.
Кхетаче дийцачарна юкъе эггара керттерчарех да, аьнна, белгалдир СВО доакъашхошта, цар цӏагӏарча наха боаггӏача боараме гӏо лоаттадар, ӏаьдалгара хьадоагӏаш дола ахча ханнахьа хьадалар, дарба де, лорашка чакхбала гӏо дар, эшаш йола молхаш ӏалашъяр, иштта вахара оагӏонца цар дезалашта духьала нийслуш дола цхьацца кхыдола гӏулакхаш а. Дегӏа маьженаш лерттӏа болх беш йоацача ветеранашта вахара хьал аттача доаккхаш дола гӏирсаш хилийтар да чӏоагӏа лоархӏаме. Къаьстта терко еш дийцр вахара хьал меттадоаладара тӏехьа юридически оагӏонцара новкъостал лоаттадарах.
Цхьаккха хаттар дисанзар кхетаче, терко ца еш. Гулбеннараша белгалдир, Даьхе лорае арабаьннарий оагӏув хьаллоацаш, цар хьашташ кхоачашдеш хилар, хӏаьта тахан из вай массане юкъара декхар да.
