Дарбанче баьхка, зулам даьраш дӏалийцар ӏаьдало
Веннача шоай гаргарча сага пхьа леха дарбанче баьхкараш дӏалийцар 1аьдала болхлоша. Из хоам «Сердалога» бир МВД.
«Бекарга бетта 28-ча дийнахьа мехкарча МВД болхлошка Пригородни кхалерча МВД болхлошкара хоам бера, Майски яхача юрта сага вахар хадаш хатар хиннад наькъ тӏа, веннача гаргарча сага нах машин лоаллаш ваьгӏачунгара пхьа цӏаба лаьрхӏа ба, аьнна. Наьсарерча ИРКБ цу миноте дӏакхаьчар Россе моттигерча ОМВД болхлой.
Травмотолог волча лоро хьадийцачох, наькъ тӏа хиннача хатара юкъе лозаваьчун хьалхара гӏо деш воаллаш, дарбанче ши маӏа саг чуийккхав. Лозаваьчунца дӏа-хьа йистхинна, машин лоаллаш ваьгӏар из волга хайча, аьтта оагӏорахьа накха болча цунна урс детта волавеннав цаӏ, иштта, лора белгалдечох, цига хиннача лозавьчун гаргарча сага а техад цо урс. Лозабаьрашта лораша гӏо даьд», - йоах тхога бенача хоамо.
Дарбанче баха, из зулам даьраш ӏаьдало ӏочубигаб, вӏашкадехкаш дола урс хьадаьккхад царгара. Царех урс дийтта воацар чувахийтав административни оагӏонца бехктокхаме оттавеш, хӏаьта лозабаьрашта дов даьр чувелла воалл, цунна духьала РФ УК гӏулакх хьадийллад.
