Къаман хьалхара турпал
Овшанаькъан Султана Русланá еза цӀи ялар
Дерригача гӀалгӀай къаманна боккха кхаъ, дуккхача хана денз сатийса дикахетар хилар 1982-ча шера, Овшанаькъан Султана Русланá Советски Союза Турпал яха цӀи а луш, дошо седкъа баларах. Из цунна балара керттера бахьан дар, Афганистане ший интернациональни декхар кхоачаш а деш, лирача тӀема юкъе коталонаш яхар, лай а воале а сагота воацаш, моастагӀчоа духьаллаттар. Цу заман чухь со, «Сердало» газета корреспондент а волаш, республикан керттерча шахьар тӀа вахар. Руслана да Ювсапа Султан-Хьамид а къаман керттерча газета юртбоахама отдела кулгалхо вар.
Из еза-йоккха цӀи а енна, цӀавеначул тӀехьагӀа, из го а, цунца вӀашагӀкхетар чакхдаккха а, цунна юкъе дакъа лаца а ловш, дукха къахьегамхой, студенташ, дешархой, Ӏилманхой, хьехархой, журналисташ, кхыдола балхаш деш бола нах бар. Сона дагадоагӀачох, Султана Руслан хилар Наьсарерча музее, «Сердало» газета редакце, Нохч-ГӀалгӀай телевидене, и. кх. дӀ. Цу тайпарча цхьан вӀашагӀкхетаре даьккха да укх йоазонца шоана гу сурт а. Мехка турпалал совгӀа, цу тӀара го йиш я телевидене гӀалгӀай редакцен йоккхагӀйола редактор Мартазанаькъан Лейла, режиссёр Йовлой Рая, передачаш дӀагойта кийчъеш хинна Малсаганаькъан Тамара, промышленни отдела корреспондент Овшанаькъан Муса, кхыбараш. Цу юкъа Руслана мел хинна вӀашагӀхетараш дийца а варгвац.
Кхувш йоагӀача тӀехьенна йӀаьххача хана дика масал хинна дӀаэттар цо хьабена никъ. Тахан а дуккхача кагирхошта лов цох тара хила, шоай майралца, Даьхен ха тӀа латтарца, деналца. Вай къамах волча сага енна, эггара хьалхара турпала цӀи яр из. Карарча хана 40 шу дизад къаман духхьашхара турпал кхоллавенна. ХӀаьта тахан из цӀи еннарий мугӀ дикка шербеннаб: Оздой Мурад, Малсаганаькъан Ахьмад, Къоастой Ширвани, Ӏарапханаькъан Марем, Евкуранаькъан Ювназ-Бек, Къоастой Абукар. ХӀаьта а царна юкъе Султана Руслан даим белгала хургва, эггара хьалхара вай къаман турпал хиларца.
