Наьсаре, ер шу чакхдоалаш, хьалъяь яргья 720 моттига лаьрхӀа ишкол
Ер шу чакхдоалаш, Наьсаре хьалъяь яргья 720 моттига лаьрхӀа йола керда ишкол. Карарча хана, из хьалъяь яьннай 90%. Ишкол хьалъеш яр я «Элитспецстрой» яха фирма. ГӀишло хьалъеш я «Дешар» яхача къаман проектах.
«ХӀанз болхлой чура балхаш доахаш ба, электротехника, арахьаа чухьнахьа а хий дӀахоттар, бӀеха хий дӀаухаш йола моттиг яр, лифт, чура гӀирс дӀаоттабар - уж балхаш доахаш ба говзанчаш.
ГӀишлон чухь эшаш мел дола хӀама да: актови, спортивни залаш, ловзара майдаш, коа тӀара моттиг», - аьлар «Сердало» газетага моттигерча гӀишлошъяра Министерстве.
Из ишкол хьалъяра, Наьсарерча Чеченски урам тӀара 22 эзар квадратни метр лаьтта хьакъоастадаьдар. Керда ишкол хьалъярга дӀадахад 620 млн сом ахча. Из йистеяьлча, Наьсарен кхален даькъ тӀарча ишколашка паргӀато хургья.
