Гӏалгӏайчен кадетий кхетаче хилар «Турпалхочун никъ» яхача программа доакъашхошца
Гӏалгӏайчен Лоаман кадетий корпуса дешархой кхетаче хилар «Турпалхочун никъ» яхача программа доакъашхошца, яхаш, дийцар «Сердало» газетага «Даьхен лорбой» ганза кулгалхочо Джанхотанаькъан Мадинас.
«Кхетаче дӏайихьар, шоайла къамаьл деш, цо таро лу доакъашхошта шоайла дикагӏа кхета. Сурхо тӏа кадеташа ӏомаду, юкъара дешар санна, тӏема дешар а. Цунца дувзаденна, Украине дӏахьош болча тӏема доакъашхоша шоай къамаьл хетадир тӏема профессена. Местой Мухьмада, Къоастой Аслана, Хьаьшанаькъан Хьамзата, Хазанаькъан Ибрахӏима, Местой Беслана, иштта Лоаман кадетий корпуса кулгалхочо Къоастой Вахас шоай балха говзал йийкъар, дийцар шоашта тӏемах ховраш, дагадоагӏараш», - аьлар хоамо.
Лаьрххӏача операце ветеранаша белгалдир, ший Даьхе езаш вола саг, цунна хьалхара са дӏадала кийча хулаш волга. Хургболча выпускникаша, шоай аргӏагӏа дош делар дика деша, хьатӏайоагӏача хана Даьхен машар лорабе.
