Келаматанаькъан Махьмуд-Ӏаьланна хетачох, ГӀалгӀайчен сийленгаш жовхьараш да
Ше «Нахацара бувзам» яхача передаче къамаьл деш, ГӀалгӀайчен кулгалхочо Келаматанаькъан Махьмуд-Ӏаьлас белгалдир, цӀихезача Тхьаба-Ерд яхача езача моттига; ВӀовнашкерча гӀалашта тӀабода никъ тоабарца дувзаденна деррига дешаш дика дага а ваьнна кхоачашде дезаш хилр, хьамсарча республикан дагалоаттама сийленгашта, цун экологена зе дергдоацаш.
«Уж вай жовхьараш да, ГӀалгӀайчен кхыйола гӀалаш санна», - аьлар Махьмуд-Ӏаьлас.
Цо белгалдир, вай республике итташ эзараш салаӀа нах боагӀа, дукха ба вайцига хила безам бола туристаш. ГӀалгӀайче хьалъергья йоккхий сийрда, дика гостиницаш. Цу лоархӀамеча гӀулакхе дакъа лоацаш хургва Гуцаранаькъан Микаил.
Мехка Кулгалхочо тӀахьийхар иштта шоашкара дакъа лаца кхыбола бизнесменаш, цар новкъосталца дегӀайоагӀаргья сихагӀа мехка туризм.
«Нагахьа санна туристически оагӀув дика дегӀайоагӀаш хуле, вайна дошо фабрикаш эшаш хургьяц», - аьлар цо, цу балха лоархӀамах ше дувцаш.
