Келаматанаькъан Махьмуд-Ӏаьлас кхайкарал дир, 1992 шера хатар хинна шу долча дийнахьа
Келаматанаькъан Махьмуд-Ӏаьлас кхайкарал дир бахархошка, 1992 шера гурахьа Пригородни кхале, Владикавказе хатар хинна цхьаькха шу доалача дийнахьа. Ший лаьрххӏача телеграм-оагӏон тӏа цо белгалдир, хатар хинна 34 шу даьннадале а, наьха фусамашкара гӏайгӏа, бала дӏабаьннабац.
Республикан кулгалхочо аьлар, цу деношка наха дукха халонаш лайра, шоай фусамах баьнна, шоаш мел леладаьр цига дита, арабала безаш хилар дукхача шерашка шоаш баьхача моттигашкара. Цу хана Гӏалгӏайче Россе къаьстта йола субъект санна отташ мара яцар. Бакъда къам, цхьоагӏо, барт болаш хиларах, духьалъэттар цу халонашта а, хӏана аьлча из вай дукхача халонех чакхбоалаш баьхача даьшкара хьадоагӏаш да.
Республикан Кулгалхочо яхачох, 1992 шу тешал деш да, сага вахар лакха мах болаш хилара, хӏаьта бехк боацаш нах боабаьрашта цхьаккха бехказло яц. Юкъарло нийсхон тӏехьа хила еза, из кхувш йоагӏача тӏехьен декхар а да. Россе дукха къамаш дахача мехка культуран-исторически тӏехьале лораяр, барт болаш къамашца бахар - из да паччахьалкхен дика дегӏаяра керттердар, из да тахан РФ Президента Путин Владимира дӏадехар.
Ше кхайкарал деш кагирхошта къаьстта терко тӏаяхийтар Гӏалгӏайчен Кулгалхочо. Цо тӏахьийхар кхувш йоагӏа тӏехье, ший къаман истори довзаш хилара, цу хана хинна чов мел йоккха я хара, тӏехьагӏа машара, маьршача вахара мах дикагӏа бовзара.
Хьатӏадоагӏача шера республика хьакхелла 35 шу даргда, Келаматанаькъан Махьмуд-Ӏаьлас белгалдир, дӏабихьа никъ хала хиннабале а, тахан хӏара сага декхар да, толамаш дахара наькъ тӏара цавалар, цхьоагӏо, барт лорабар.
Юххера а, мехка Кулгалхочо кодам бийцар 34 шу хьалха цу хатарах бейнарий гаргарча нахага, цхьаккха дезал ма хилба шоай вахарах боха безаш, аьнна, аьлар цо.