Хьехархошта алапи дӏадалара гӏулакхага хьажа, аьнна, тӏадиллар мехкадас
Республикера вахархо ӏажанаькъан Сулейма мехкадаьцарча кхетаче леткъар; хьехархошта алапи ханнахьа хьателац, аьнна. Из вӏалла а хила йиш йолаш хӏама дац, аьнна, белгалдаьккхар Мехкадас. «Цхьаккха а тайпара хилийта йиш йолаш хӏама дац из, - аьлар Мехкадас. – Паччахьалкхено ший декхараш боаггӏача боараме дӏахьош латт, алапена эшаш дола ахча цӏаккха а гоа ца деш, ханнахьа хьакъоастадеш да».
Республикерча дешареи ӏилмани гӏулакхех йолча министерствонна тӏадиллар Мехкадас из гӏулакх дикка тахкар, ӏажанаькъан Сулейма белгалъеш йолча моттиге алапи гоадара бахьан малагӏа да хьеже, из гӏулакх лертӏача даккха, аьнна.
Къаьстта ишколашта кулгал деш барий балхага хьеже, хьехархой бокъонаш боаггӏача боараме лораеш йий тахка, аьнна, тӏадиллар республикан Кулгалхочо.
