ГӀалгӀайчен бахархой даькъалабийцар Республикан Кулгалхочо, Россе парламента Ди хиларца
ГӀалгӀайчен Кулгалхочо Келаматанаькъан Махьмуд-Ӏаьлас, Россе парламента Ди хиларца, даькъалабийцар вай бахархой. Цо иштта белгалбир парламента, ОМСа викалаш, цар ираз, аьттув хилар ловш, яхаш, дийцар «Сердало» газетага республикан кулгалхочун зарбан болх лелабераша.
«Дег чура даькъаладувц аз шо, Россе парламента Денца!
Массайолча парламенташа хьакхолл бокъонашца ювзаенна кӀийле йола болх, цо кхоачашду лоархӀаме дола паччахьалкхен декхараш, демократи чӀоагӀъяр, наьха хӀарма вӀашагӀйоллар, парламента Ӏадаташ чӀоагӀдара доккха дакъа юкъедахь.
ГӀалгӀайчен Халкъа Гуллама болх дика дӀахьош хиларо укх ткъаь итт шера лоархӀаме политически дешаш кхоачашдеш, экономика дегӀайоалаеш, машар лоаттабеш, гӀалгӀай къаман барт-цхьоагӀо Ӏалашъеш дика къахьийгад», - йоах ГӀалгӀай Республикан Кулгалхочун кхайкарал тӀа.
Цо иштта белгалдир, таханарча дийнахьа ГӀалгӀай Республикан парламенто, ОМС викалаша наьха хьашташ лорадеш долча даькъе керттера гӀулакх дӀалоацаш хилар. Наха а Ӏаьдала а юкъера юкъ лораеш, из вӀашагӀйоллаш, пайдана йола бокъоний лард чӀоагӀъеш, вахара-экономически оагӀорахьа республика дегӀайоагӀаргйола бувзам лелабеш хьаений уж мотигаш.
Махьмуд-Ӏаьлас белгалдир, законаш кхоллача а уж кхоачашдеча а Ӏаьдала оагӀонаша шоайла айхха бувзам лелабеш хиларо паччахьалкхен лард чӀоагӀъю, ГӀалгӀай Республикан бахархой вахара хьалаш тоаду.
Цо, дег чура ловца боаккхаш; цар ираз, аьттув хилар а закон леладеча балха тӀа, шоай хьамсарча ГӀалгӀайчен, ерригача Российски Федерацен балха даькъ тӀа керда толамаш дахар а ловш, ловца баьккхар.
