Мехка кулгалхочо теркалдечох, вай мехкарча моттигаша шоаш арахеца хӀама тахан лоаттаду Юхерча Малхбоале, Юкъерча Азе, СНГ. «РИАК» яхача заводо ший кӀалах яь хӀамаш Турце, Эрмалой мехка дӀакхухьийт, Саудовски Араве ший кхоачам лоаттабе кийчо еш я «Южни» яха коа тӀарча оалхазарий моттиг. Вай мехка арахецача хӀаманца безам болаш ба Египте, Катаре, ОАЭ. ТӀехьа тӀайоагӀача хана Китайца, Индеца цу мугӀарера бувзам хотта, чӀоагӀбе лерхӀаш ба мохк.

«Мехка йоаржаеш йолча беркатеча къаман проектех а дийцар. ТӀехьарча пхе шера къаман проекташка, юртара моттигаш тоаярах йолча, иштта кхыйолча паччахьалкхен программашка гӀолла хьалъяьй республике 50 берий беш, 48 ишкол, иштта 7,4 эзар совгӀа болх бе моттигаш Ӏалашъяьй», - белгалдир вай Мехкадас, журналисташца даьча къамаьлага гӀолла ший интернета оагӀонашка.

Мехка кулгалхочо дийцар 2030-гӀа шу отталца кхоачашде дезаш мехка хьалхашка латтача декхарех, цу юкъе да 100 км керда никъ биллар, юртбоахама моттигашта тӀадолха наькъаш меттаоттадар, Илдарха-ГӀалий тӀара нувхаш дӀакхувсаш хинна моттиг дӀаяккхар.

«Массайола оагӀонаш теркалйича, хӀара денна хӀама тоалуш, къахьегаш, ший никъ дӀахьучарех ба мохк», -  белгалдир Мехкадас.