Кагирхошца вӀашагӀкхийтар депутаталла кандидаташ
Магасерча горсовета депутаташ хила безам болча кандидаташца кхетаче йир кагирхоша, шахьарерча культуран гӀулакхех йолча моттиге. «Цига венача пхе кандидата юкъе вар бизнесмен Халмарзанаькъан Мухьмад, паччахьалкхен университете хьехаш вола ГӀоанадлой Ислам, Магасерча мэре болх беш вола ГӀазданаькъан Мухьмад, республикерча кардиологически диспансера лор йола Коазой Мадина, Магасерча лицея кулгал деш йола ГӀазданаькъан Ада.
ХьатӀабоагӀача бетта дӀахьоргдолча хоржамашта юкъебаха безача кандидатий лерхӀамаш довза ловш бар кагирхой. Шоашта дагалаттарех дийцар цар кандидаташка: кхааш ийду гулакх хоададарах, наха болх-моттигаш Ӏалашъярах, кагирхошта лаьрхӀа керда проекташ кхолларах, кхувш латтача тӀехьенна накъадаргдолча хӀамай наькъаш хьаделларах.
Кандидаташа белгалдир, шахьаре спорта моттигаш; бахархошта, хьаьшашта салаӀа моттигаш хьалъе езилга. Шахьара куц тоадергдола гӀулакхаш да тахан доаржаде дезараш. «Геттара хала дарех да тахан, вай унахцӀенон хьал ма хетта цахилар. Лакха говзал йола лораш эш вай дарбанчешка. Цу гӀулакхага цӀенхаштта хьажа лерхӀ оаха. ХӀетта дийша баьннача кагирхошта болх-моттигаш лаха еза», — аьлар кандидат йолча Коазой Мадинас.
