Россе хьалхале къайсача яхьашка, пхи майдилг яьккхар Долакха-Юртарча кикбоксёраша
28.06.2025 14:13
Нальчике дӀайихьача Россе яхьашка, пхи майдилг йоаккхаш, белгалбаьлар вай кикбоксераш. Из хоам «Сердалога» бир Долакха-Юртарча ишколера.
Сийлахь-боккхача Даьймехка тӀема Котало яьккха 80 шу дизара хетаяьча яхье, шоай говзал гойта аьттув хилар мехка тайп-тайпарча миӀингашкара тӀабаьхкача студентий, дешархой. Программан юкъе яр «фулл-контакт», «лоу-кик», «лайт-контакт», «поинтфайтинг».
Вай мехкахошта юкъе чемпионаш ба аьнна белгалбир Аькхенаькъан Адам, Балхай Ислам, борза майдилгаш яьхар Ӏалихананаькъан Ильяса, Баркинхой Иризхана, Оздой Ӏаддал-Малика. Беррига латархой берий - ондаргий спорта ишколе Элмарзанаькъан СаӀида, Арсанаькъан Зелимхана Ӏомабеш ба.
