Хала боахкача дезалашкарча 60 бера барзкъаш ийцар «Дикача наьха клубо»
26.03.2025 10:29
Рамадан бетта шоай беркате гӀулакхаш доаржадеш я гӀо деш йола «Дикача наьха клуб». Таро хала йолча дезалашкарча 60 бера барзкъаш ийцар цу беркатеча наха гӀо деш. Из хоам «Сердалога» бир КДЛ зарбан болх лелабеча Гиренаькъан Лейлас.
Рамадана цӀай дезде арабовла мел эшаш дола барзкъаш ийца кийчдаьд цар бераш. Уж бераш догьийша цахилийтар лоархӀаме дар ганза болхлошта, хӀаьта хӀанз деза цӀай долча дийнахьа арадовла кийча да уж. Берий даьша, ноаноша доккха баркал аьлар КДЛ болхлошта, шоай берашта иштта хоза терко ярах.
