Российски кинон Денна хетабаь видеогойтам ба мехка дӀахьош
«ГӀалгӀай мехкара кинокхоллам» яха видеогойтам ба вайцига дӀахьош. Мехкахбаьхача наьха мемориальни комплексе го йиш я гойтам. Къаман кинематографи хьахилара истори довзаргда бахархошта.
«Гойтама керттера декхар - бахархошта вай кино хьакхолларца дувзаденна денош довзийтар. Российски кинематографе къахьегаш болча цӀихезача говзанчий кхоллама никъ бовза йиш я цига. Мехка кинон хӀама хьалъоттадеш лаьттарех ба Котанаькъан Берд, Ӏоахашканаькъан Шамал. Цар дукха къахьийгад цу наькъ тӀа. Иштта белгалбе безарех ба Мамилганаькъан Сулумбик, лакха начӀал дола актёраш Новрбенаькъан Руслан, Янданаькъан Тамара, Цисканаькъан Мухьмад, иштта кхыбараш а», - дийцар «Сердалога» гойтам дӀахьош хиннараша.
Таханара ГӀалгӀайче цу оагӀонцара ший хӀама дикка тоаде йолалуш мара яц, бакъда доаржаде, довзийта шортта да цун истореца. Иштта гойтамаш дӀакхахьаро керда начӀал дараш гучабоах мехка, цхьацца балхаш хьакхоллара тӀехьа дог ураоттадергда кинон даькъе къахьега ловрий.
